Skip to main content

Italië: Rome 2

Italië: Rome 2

In Junie hierdie jaar het ek en my suster Italië toe gevlieg vir drie weke se vakansie (13 Junie – 4 Julie 2015). Die eerste twee weke daarvan was ons op ‘n toer dwarsdeur die land, die laaste week op ons eie in Sisilië.

Vrydag 26 Junie 2015

Van Orvieto af is ons terug Rome toe en het die aand vir oulaas saam met die res van die toergroep gaan uiteet.

Die Vrydag het ek en my suster saam met ‘n paar van die ander wat nog oor was van die toergroep goed in Rome gaan kyk wat ons die eerste keer nie het nie: die Spaanse trappe, die Trevi-fontein (besig om herstel te word), Piazza Nevona en die Pantheon.

Daardie dag was daar nog ‘n komplikasie: die vervoerstelsel van Rome het ‘n staking gehad. Die moltreine om van ons hotel na enige plek anders in die stad te kom het net tot 8:30vm geloop en toe weer die middag 17:00 tot 20:00.

Maar ons het darem heelwat gesien en toe vir die res by die Colosseum totsiens gesê, omdat ons klaar daarbinne was. Dis altyd hartseer om afskeid te neem en op jou eie verder te gaan.

Ons wou nog ‘n paar ander goed sien, so ons is terug verby die Forum na die Piazza Venezia en om die Monument vir Victor Emmanuel II om na ‘n woonstelblok uit Romeinse tye te kyk. Dit is ‘n baksteengebou, met boë en donker opening na binne op die verskillende vlakke. Ons het dit in ‘n BBC dokumentêr – aangebied deur Mary Beard – gesien.

Daarvanaf is ons te voet na die Piazza Barberini en die klooster van die Cappucini monnikke om hulle katakombes te sien. Nee, dit is nie wat ek verwag het nie en, nee, ons kon nie foto’s neem nie en, nee, ek is nie ‘n groot aanhanger van kunswerke uit menslike beendere nie… Nie dat dit nie met respek en oorleg gedoen is nie, maar nie vir my nie.

Toe het ons, ons omswerwinge hervat terug verby die Trevi-fontein en na Marcus Aurelius se kolom gaan kyk. Dit het ook ‘n verhaal uitgekerf in ‘n spiraal om die kolom soos Trajan se kolom, maar is later opgerig.

Met die vervoerstaking is ons verder te voet terug na die hotel, verby Castel Sant’Angelo en die Vatikaan. Toe kon ons darem weer ‘n moltrein kry en is met bagasie en al na Roma-Tiburtina stasie om ‘n oornagtrein 11:00 die aand na Reggio di Calabria te kry.

Italië: Orvieto

Italië: Orvieto

In Junie hierdie jaar het ek en my suster Italië toe gevlieg vir drie weke se vakansie (13 Junie – 4 Julie 2015). Die eerste twee weke daarvan was ons op ‘n toer dwarsdeur die land, die laaste week op ons eie in Sisilië.

Donderdag 25 Junie 2015

Ons het by Orvieto oppad van Venesië na Rome aangedoen. Dis ‘n stad wat al uit Etruskiese tye (voor Romeinse tye) dateer en die ou gedeelte is bo-op ‘n heuwel met kranse regrondom. Ons is met ‘n funicolare boontoe, wat ‘n soort kabelkar op ‘n baie styl spoor is.

My indruk van die ou gedeelte is die van ‘n dorpie met nou klip straatjies, ‘n groot kerk en baie klein winkeltjies. Daar is ‘n hele ondergrondse stad ook, gebou as terugval in tye van aanval. Mens kan ‘n toer van dit neem, maar ek en my suster het daarteen besluit. Nou, natuurlik, is ek spyt ons het nie. Sal maar moet teruggaan ;).

Vir die foto’s het ek weer by die standaard 50mm lens gebly. Mens kom nogal ver daarmee! Die katedraal is daarom ‘n 2-dimensionele panorama, wat Photoshop nogal goed aanmekaar kan sit. Nota aan self: onthou om met die volgende panorama seker te maak jy het die hele ding afgeneem!

En, ja, ek wonder nou nog hoekom daar ‘n standbeeld van ‘n vlieënde koei op die katedraal is…

Italië: Assisi

Italië: Assisi

Junie hierdie jaar het ek en my suster Italië toe gevlieg vir drie weke se vakansie (13 Junie – 4 Julie 2015).. Die eerste twee weke daarvan was ons op ‘n toer dwarsdeur die land, die laaste week op ons eie in Sisilië.

Donderdag 18 Junie 2015

Van Sorrento af, is ons na Assisi. Die dorp is bekend as die geboorteplek van St Francis en die Katolieke orde, die Fransiskane, wat hy begin het. St Francis het ‘n omwenteling in die Christendom in Europa gebring in die vroeë 1200’s en daar is ‘n Basilika in Assisi vir hom opgerig na sy dood.

Al die foto’s wat ek in die dorp self geneem het, is met ‘n 50mm F1.4 vaste lens geneem. Net die nagfoto is met ‘n zoom-lens (28-135mm) op 135mm geneem, want dit was geneem van waar ons gebly het die aand, onder in die vallei. Omdat ek geweet het ek wil nagfoto’s neem, het ek ‘n klein tafeldriepoot en ‘n sneller saamgevat Italë toe. Die nagfoto van Assisi was op F13 om dit skerp te hou en die sluiter was 30s oop.

Italië: Pompeii, Sorrento en Capri

Italië: Pompeii, Sorrento en Capri

Junie hierdie jaar het ek en my suster Italië toe gevlieg vir drie weke se vakansie (13 Junie – 4 Julie 2015). Die eerste twee weke daarvan was ons op ‘n toer dwarsdeur die land, die laaste week op ons eie in Sisilië.

Dinsdag 16 en Woensdag 17 Junie 2015

Van Rome af is ons na Pompeii, naby Napels, waar ons ‘n toer gedoen het van die ruïnes. Behalwe vir die klipstrukture wat die uitbarsting van Vesuvius in 79 nC oorleef het is daar heelwat artifakte gevind en selfs fresco’s teen mure het behoue gebly. Maar dit is die menslike oorskot wat eintlik Pompeii so bekend gemaak het. Die plek is met ‘n baie dik laag as bedek a.g.v. die uitbarsting en dit het alles bewaar. Toe dit opgegrawe is, was daar holtes rondom die beendere wat in die as vasgevang was, wat toe met gips gevul is en die  vorme van die oorspronklike liggame wys.

Na Pompeii is ons na Sorrento, waar ons geslaap het en toe die volgende dag na die eiland van Capri toe is met ‘n boot.

Italië: Rome 1

Italië: Rome 1

Junie hierdie jaar het ek en my suster Italië toe gevlieg vir drie weke se vakansie (13 Junie – 4 Julie 2015). Die eerste twee weke daarvan was ons op ‘n toer dwarsdeur die land, die laaste week op ons eie in Sisilië.

Maandag 15 Junie 2015

Natuurlik het ons in Rome begin. Oud soos die berge, laag op laag op laag se geskiedenis. Standbeelde, piazza’s, ou Romeinse oorblyfsels en baie toeriste.

Eerste was die Vatikaan museum: derde grootste museum ter wêreld met kunsskatte vir ‘n vale en heeltemal te veel mense. Die grootste uitdaging hier was om sonder ‘n flash af te neem, sodat die kleure van die skilderye, ens. vir die nageslagte behoue kan bly.

Daarna was dit die Colosseum en forum’s. Omtrent alles hier was met ‘n wyehoek lens afgeneem. Die foto van die Colosseum was op 10mm.

Les nr 1: jou voete gaan seer wees…

SAAF Museum Lugskou 2015

SAAF Museum Lugskou 2015

So paar weke terug was ek by die SA Lugmagmuseum se lugskou by Zwartkop Lugmagbasis. Daar was baie fotogeleenthede die dag. Ek het meestal met twee manual 80-200mm lense: ‘n Rollei F2.8 en ‘n Pentax F4.5-5.6.

Die maklike gedeelte was die fokus. Met die vliegtuie so ver, was dit meestal op oneindig. Dis net wanneer geland het en reg voor ons verby gekom het, wat ek gesukkel het. Is nie meer gewoond aan met die hand fokus nie.

Vir ‘n vliegtuig in die lug is dit nogal moeilik om in ‘n foto vas te vang wat jy ervaar. Vir jou is die vliegtuig onderstebo in ‘n skerp draai, maar in die foto kan dit enige kant om wees as jy nie konteks het nie. Die rook wat die akrobatiese vliegtuie uitgegooi het, het baie gehelp, ook as hulle verby mekaar vlieg of as jy die horison kan inkry.

Hier is ‘n paar van die bestes wat ek geneem het. Besluit self hoe suksesvol hulle is.

Fokuskwaliteit en F-stop

Fokuskwaliteit en F-stop

Enige fotograaf wat nie meer ‘n beginner is nie sal vir jou kan sê dat die fokusdiepte in ‘n foto verskil by verskillende F-stoppe. Hoe kleiner die F-stop, hoe minder is in fokus en hoe groter die F-stop, hoe meer is in fokus…

Maar, en dit is ‘n groot maar, wat ek nie geweet het nie is dat die F-stop ook beïnvloed hoe skerp die fokus is. Nou die dag toe ek op 100% vergroting na ‘n foto van my kyk wat met ‘n wydoop 28-135mm Canon zoom-lens (F3.5 by 28mm en 1/40s) geneem is, kon ek nie een plek in die foto kry wat heeltemal skerp is nie!

Bygesê, dit is nie die skerpste lens in die wêreld nie, maar iets moet tog in fokus wees, dan nie? Of is dit net ‘n baie swakker lens as wat ek gedink het?

Toe vra ek maar iemand wat heelwat meer van lense af weet as ek en sy antwoord was dat ‘n lens op sy skerpste is in die middel van sy F-stop bereik. Hoe nader aan die punte dit is (d.i. wyd oop of speldpuntklein diafragma), hoe “sagter” is die fokus.

Om dit te bewys het ek ‘n klomp keer dieselfde plek afgeneem met die 28-135mm lens teen verskillende F-stoppe. Onder is die resultate.  Die fokus was elke keer in die middel van die foto, op die area met ‘n rooi sirkel om, maar soos die uittreksels van die verskillende foto’s wys, is “in fokus” nie dieselfde as “skerp” nie.

FStop_vergelyk_28_135mm

 

Chiaroscuro stillewes

Chiaroscuro stillewes

So ruk terug het my suster gevra dat ek ‘n paar eenvoudige stillewes afneem in ‘n chiaroscuro styl, vir haar om te skilder.

Daar is ‘n hele paar tutoriale op die net oor hoe om foto’s te neem vir skilder. Die een wat ek na gekyk het is hierdie een. Behalwe vir die komposisie tips is die hoof ding wat ek daaruit geleer het om ‘n vlakker fokusdiepte te gebruik, omdat dit is hoe die oog sien en wat sin maak in ‘n skildery.

Vir die chiaroscuro het ek my flash baie na die kant gesit en probeer om so die agtergrond in skaduwee to hou, terwyl die voorwerp verlig is. Dit help ook om soveel moontlik afstand tussend die agtergrond en die voorgrond te hê. Een flash was oor die algemeen genoeg, want mens soek ook die skaduwees om diepte aan die stillewe te gee.

Stillewe - Antieke groen glasbeker 1
Aperture: 14 Camera: Canon EOS 7D Iso: 100
« 1 van 6 »

Een ander ding om in gedagte te hou: met helder kleure vir ‘n agtergrond, soos die rooi, is jy geneig om daardie kleur ook op die voorwerp te kry…

‘n Blouaap foto

‘n Blouaap foto

Partykeer is mens net gelukkig, selfs met die verkeerde verstellings op jou kamera. So… 1/25 van ‘n sekonde, met ‘n 135mm lens is heeltemal te stadig om nie die kamera se beweging in jou hande op te tel nie. Die duimreël is mos ten minste 1/(die lengte van die lens).

Maar, as ‘n blouaap ma met haar kleintjie onder die maag voor jou verby hardloop, selfs op die grasperke van Sun City, is die instink nogsteeds om saam met hulle te draai en ‘n foto te neem. En dalk is dit die moeite werd:

Blou ape aan die beweeg
Aperture: 5.6 Camera: Canon EOS 7D Iso: 100